劉八方

刊於遵義快訊第二期

新書推介《The World is Round》

「從來沒有看過如此發人深省的著作，是每一個自以為是的人都必讀之作！」
--- 著名時事評論員鬍鬚菜

「推薦給所有正修讀EMBA的管理人：別人的錯誤示範，就是自己進步的動力。」　　　　　　　
--- 企管專家右登珊

劉遵義是著名經濟學家兼中文大學校長，最近在《大學線》的訪問中，劉校長以伽利略自比，指出伽利略當年提出地球是圓的論調時，受到教皇、教會及保守勢力的迫害，但最終歷史證明了伽利略是對的，並以此比喻自己目前的處境。

有鑑於此， 攞你命出版社特別整理了劉校長上任四年來的演講稿、訪問等，出版了《The World is Round》，務求以劉校長的治校失敗史，引戒各商界、公共事務管理人對「長官意志」、「執迷不吾」、「自以為是」等管理大忌的警覺，希望對社會大眾有所裨益，以免重蹈覆轍。

作者：（疑似）劉遵義
售價：$ 1 6 7 / N T 6 6 6 (貼錢價）
出版：攞你命出版社
*隨書贈送地球儀乙個

印印腳與鬼食泥

老媽子教落：「人搖福薄，樹搖葉落」；由細講到大，到而家返屋企食飯，一「印腳」都會俾佢鬧一餐。

之不過，我懷疑已經搵到一個好強嘅例子反証老媽子的說法。

話說上個月去咗逸夫書院搞嘅「校長夜話」，諗住聽吓校長今次又有咩新計劃，點知校長講嘢悶到嘔，咦咦哦哦「鬼食泥」之餘，又係嗰三幅被；唯一收穫，竟然係見到校長以每秒二百下的極速「瘋狂印腳」！

現場所見，劉校長一路答問題，就一路起勢「印」，只可惜當日冇帶 DV-cam 响身，如果唔係就可以同大家分享劉校長的「印腳」風采！

唔知係咪「印腳」有助思維，劉校長上任後一直發揮「醒目仔」本色，幾下擦鞋功夫就冧掂中央醒佢一個「全國政協」函頭，你都咪話唔叻！

之但係，劉校長如果仲係咁公開「印腳」，唔知會唔會「逾越社會道德底線」（校方當年對《學生報》情色版之評語）？須知道，大部份好似我老媽子嘅普羅大眾，都未必接受堂堂大學校長係咁「印腳」呢

激死阿公

話說近月《人民政協報》（ 全國政協的機關報） 訪問新任政協劉遵義， 問及學術抄襲的看法。劉大人竟以書帖臨摹及古典詩詞為例， 指抄襲問題「與中國的文化傳統有關」， 不同於外國有加注加括弧的傳統習慣云云。其中一段妙論，值得大段引錄： 「蘇東坡最出名的一首詞《水調歌頭》， 『明月幾時有， 把酒問青天』， 有一句『起舞弄清影』是借用了李白的詩。蘇東坡是聰明絕頂的人， 他是真正故意抄襲麼？ 所有人都應當明白。但『起舞弄清影』沒有加注。這是中國沒有加注的傳統， 不是惡意的抄襲。」劉大人是浸鹹水的經濟學權威， 大概看不起甚或不知道儒家傳統的經傳注疏， 但將學術和創作混為一談，也未免太誇張了。

該報記者還咄咄迫人， 竟然問中大的書院制度跟中國古代的書院制度有沒有傳承， 眼中只有劍橋牛津耶魯哈佛的劉大人自然立刻露底： 「我不清楚中國古代的書院要不要住在一起」。不知道白鹿洞書院不奇怪， 奇就奇在劉大人連梁祝都沒有看過。這樣的人來談「結合傳統與現代， 融會中國與西方」可真教人冒汗， 如果于右任知道他外孫是這副模樣，不知會怎麼想？

高考生致遵義信

本小組收到一位高考生傳來電郵，說不忿遵義的言論，全文照錄如下（編輯們睇完都覺得香港仲有希望）﹕

劉先生：

一．你稱自己係經濟學者，唔回應政治問題，咁你即係意指自己只會管關於經濟嘅事。既然係咁，你為什麼做中大校長呢？為什麼不好好做一個教授呢？？

二．你說擔任政協屬私事，但你不知道全國政治協商會議係一個國家既咨詢架構，係公職，有公共責任。你將國家托付俾你嘅、對國家政策有一定影響力嘅職務當做「私事」，將公作私，你明白一個政協是做什麼的嗎？？

三．你叫學生唔好理咁多，難道你不知道我地都是中華人民共和國嘅公民，有權參與國家嗎？難道你不知道政協就是要「為人民服務」，將人民的聲音帶到建制中嗎？難道你不知道你是人民的僕人嗎？

劉先生，請你迴避學生嘅問題時，多想一點，多準備一點，做到政治正確多一點。

又反對？！冇錯！今次係：
反對新亞校友會
辦冰川郵輪團
加劇全球暖化

做中大領導層有時真係幾頭痕， 真係搞邊樣死邊樣。好似最近新亞校友會搞咗個「阿拉斯加賞冰川八天郵輪假期」， 原本諗住一班校友高高興興咁聚首一堂， 睇吓大自然壯麗景色， 實行「天人合一」一番。點知咁都遇到反對聲音。

話說有新亞畢業生見到有個咁嘅團， 覺得唔係好環保，於是响潮人網站Facebook搞咗個group，一於反對呢個團咁話。

最抵死嘅係， 連支聯會、教協監事會主席司徒華（ 華叔） 都加入聲援， 你都咪話唔把炮！ 估唔到華叔除咗關心中國民主同人權外，仲咁關注全球暖化！

不過講返轉頭，校友會今次又真係唔係咁識do，而家乜都要講環保，連前美國副總統 Al Gore 都要去宣揚全球暖化的問題。計我話， 今次都仲可以補鑊嘅， 鄙人大膽建議校友會大搞「碳中和」， 於中大種番咁上下樹木，平衡番釋放出嚟嘅CO2，咁就解決問題啦！

Facebook網址：h t t p : / / w w w . f a c e b o o k . c o m / g r o u p .php?gid=10622363084
郵輪團詳情：http://www.naalumni.org/index.php?option=com_content&task=view&id=79&Itemid=2

Group Info
Name:反對中大新亞校友會辦賞冰川郵輪團加劇全球暖化
Type: Common Interest - Beliefs & Causes
Description:

全球暖化持續，香港冬天快要消失。環境問題迫到埋身，但以宏揚中國文化為己任的中大新亞書院校友會，竟在此時舉辦阿拉斯加賞冰川團，實是置傳統中國天人合一之理念不顧。賞冰川團安排校友飛加拿大以及乘坐豪華遊輪，湧往欣賞「鬼斧神工的天然地貌」，以消費之名包裝環境保護，排放二氧化碳兼製造大量垃圾，與新亞「手空空、無一物」的精神背道而馳。新亞校友，中大校友，關心環境的朋友，請加入這個小組，或電郵予新亞校友會contact@naalumni.org表達意見，保存我新亞傳統與精神，保護地球錦繡河山!