香樹輝：中大校友 Proxy War

上星期五《蘋果》李八方有篇「中大校友吹雞護校」，幾嚇人。不 少在中環尖沙嘴搏殺既校友，睇完嚇左一跳，互相打電話通報，因為佢地平時忙於打工，養妻活兒或養夫活女或夫妻同時在外勞動，上顧高堂，下養子女，幾難搵到時間理會中大校友會評議會之事。曾有一位月報總編輯，港大畢業，在中大羅碩士學位，於是港大中大既校友會評議會佢都去過。幾年前佢對左丁山講：「港大評議會開 AGM，半個鐘頭之內就可以散會。中大評議會呢，我去過一趟，淨係校友辯論就似足立法會，一講就成個下午，我開開下會議，見唔對路，都要鬆人啦，邊度有咁多時間呀？」

中大人性好辯，最叻自己鬧自己，在校時一定罵校長，畢業後本來冇時間鬧啦，要為前途著想，努力工作，但十年來興起一股潮流，就係有d人畢業之後還是留戀學生生活，唔想在社會競爭搏鬥，而係想返回熟悉校園搏鬥，在下一代學生面前顯威風，究竟目的目標為何，旁人想不通。端午節在馬場碰到港大校董會主席梁智鴻及徐校長，兩人都唔知幾輕鬆，梁主席掛上一個「起錨」標記，十分搶眼，如果佢係中大主席或中大校長，恐怕無此時間、心情矣！劉校長同是行會成員，如果佢亦掛個「起錨」襟章在中大出現，恐怕出唔到校門。港大學生會果然好有理性。

李八方（港大畢業生）驚中大唔夠熱鬧，公然為支 聯會常委李耀基（聯合政政 2009），徐淑梅（崇基心理 2002）及黃俊邦（逸夫政政 2006）三位拉票，徐、黃兩位曾做過亞視、港台及社民連，同是廿一世紀中大產品。李八方冇提及姓名另外三位校友評議會常委候選人，據知係呂令意（新亞英文 70），前何文田官中校長，現任中大香港教育研究所兼任導師（擬任校長培訓班）；李漢祥（崇基工管 1993），曾任 Oracle高級經理、現管理諮詢公司董事；蔡明都（聯合會計 1988）現任中大創業研究中心項目總監。以往本來冇乜中大人理會評議會選舉常委，經李八方大力宣傳，好多成日話唔得閒既校友紛紛起動，實行一次護校行動，防止激進分子惡搞，將校友評議會政治化。六月二十六日本是平凡日子，呢日崇基利黃碧瑤樓演講廳勢必逼爆。

來源：《蘋果日報》