左丁山：何苦自作賤

編按：員工總會會長吳曉真批評中大，左丁山叫佢咪留低。與「唔鍾意香港無民主咪唔好留係香港」同樣邏輯。

蘋果日報
E07 | 名采論壇 | GG細語 | By 左丁山 2010-07-03

星期三本欄講諜影重重，估唔到現實生活裏立即發生。星期二BBC晨早報導美國FBI大破俄羅斯間諜網，拘捕十人。據講呢班間諜以不同身份，甚至係生兒育女夫妻檔，潛伏美國多年，搜集不同情報，而輸送情報嘅方法就同間諜電影、小說嘅情節一模一樣。一位美國太太對於鄰居夫婦竟然係俄國間諜，大表震驚，話發夢都估唔到。

所以呢，現實政治係好殘酷嘅，並非理想主義、空想主義、左傾盲動主義、右傾盲動主義等等激進分子想得咁簡單，有啲可能讀政治學讀到走火入魔，信書本所言，信足百分之一千，咁就一世空想，不能自拔。

左丁山將篇「曲線入中大」（高慧然，六月廿七日）交畀三位來自上海、瀋陽及南京嘅內地生睇，問佢哋嘅意見，呢三 位學生分別自浸會大學及中文大學得學士及碩士學位，現留港工作。兩女一男睇完後，猛咁搖頭，對左丁山講：「全省考24,776名，可以入到中文大學，完全不可能。我們認識的一些中大內地生的高考成績，棒得很，達到北大、清華的要求，只是他們選擇來香港而已，這位大陸讀者一定是誤聽流言。」

到大陸讀中學，以內地高考成績參加全國聯招，報讀中大，考到全省第247名就可能一定得，考到第24,776名，要搵神仙賜福打救。有人講中大係不入流大學，又有中大職員吳曉真（中大員工總會會長，據YouTube video，職員疑似是吳曉真）講CUHK即係The Cheapest University of Hong Kong，咪由得佢哋講到夠囉，如果中大係最cheap嘅大學，做乜留戀中大嗰份工呀，有料嘅，走去另一間CUHK（城市大學）搵工啦，唔好自貶身價，侮辱自己。

呢間未入流嘅cheap U又幾惹人妒忌噃。據《南華早報》（六月廿七日）報導，全世界最高級，最有prestige之一嘅獎學金Rhodes Scholarship（得獎人叫做Rhodes Scholar），由1998年至2010年呢十三年中，中大學生成為Rhodes Scholar十次，香港大學學生得過兩次（2001，2003），北京大學學生得過一次（2009），一間cheap U學生有如此驕人成績，咁港大與北大咪係cheaper than the cheapest？或者成個中國（包括香港）嘅大學都係咁Cheap，中大只係庸中佼佼？唔怪得陶傑成日崇洋，因為洋人唔會自作賤也。