2008年11月12日 星期三

遵義短打﹕潮玩iPhone,唔識「高清」?















遵義快訊第3期

潮玩iPhone,唔識「高清」?

話說今年七月,有記者响名人蒲點中環「香港會」(Hong Kong Club)撞到劉校長,仲見到佢拿住個新iPhone舞黎舞去,記者走埋去問校長對此「潮物」有咩評價,佢就鬼咁風騷咁笑住點頭話:「唔錯,唔錯。」

其實,响香港會出出入入嘅都唔係等閒之輩,加上劉大人月入十幾萬,幾千蚊個iPhone又點會放在眼內,當多件新玩具玩吓而已。不過呢,我就比較關心劉大人識唔識得用iPhone個錄音功能啦;猶記得當年中大教院合併風波,撲朔迷離嘅「巨頭飯局」又係响香港會搞,唔知當時劉大人係咪飲多咗,事後乜都話「唔記得」;今時今日佢有iPhone在手,16GB memory加上錄音功能,即使個飯局長三日三夜都錄得晒,仲駛乜怕事後口同鼻嗌?計我話直頭要向中大claim番錢就真,話晒都係公事所需。

講完劉大人新潮一面,以為佢走在時代尖端,點知有次佢同記者吹水,俾人問佢間屋(即係「漢園」,响中大對面馬路上的山頭)收唔收到「高清」,佢仲傻更更咁反問:「……高清……駛唔駛錢架?」真係唔到你唔服!


榮任經濟機遇委員中大職工有排驚!

繼全國政協之後,劉大人又再榮任新公職,成為特區「經濟機遇委員會」一員,仲話「感到責任重大,將竭盡所能,為維持本港經濟的繁榮貢獻力量。」,講到任重道遠咁款。

此一「經機會」,開頭俾人話係「吹水會」,點知唔夠幾日,委員已各有實際行動。先有梁高美懿(匯豐銀行)、施永青(中原地產)削減人手,後有馮國經(利豐)、戴維思(渣打銀行)又話裁員;劉大人身為經機會要員,統領公營院校,手下教職員人數逾五千人,個個出政府糧,劉大人又點可以唔做d動作聊表心意?中大職工今云危矣!


酒後吐真言:校長性格對對碰!

劉校長近年俾人鬧得多,最近實行玩「潛水」,好少見佢响報紙出現,點知都俾我搵到有關佢嘅故仔!

話說香港高等院校教職員會聯會(高教聯)早輪北上交流,中大職員協會(職協)會長李永元都有隨團,仲大談歷任四大校長(即高錕、李國章、金耀基同劉遵義)嘅性格!佢老友李博士又認真俾面,將之一五一十寫出嚟公諸同好,
原文如下:
四位校長各有不同之處:「有的是學者書生型,沒有專業行政管理經驗,甚麼也抱有『做實驗試試看』的心態;有的是喜歡玩人事、玩手段,自視很高的富家公子;有的是親切而圓滑的人;有的是『縮骨』的、不想付出的,貪圖私利的人。」至於誰是哪一位,便請讀者用自己的雪亮眼光去判斷。

李博士咁寫法真係畫公仔畫埋出腸,唔駛明眼人都一睇就知講緊邊個。之不過.中大職協一向俾人感覺都係「以和為貴」,同管理層「有商有量」,今次爆大獲都唔知會唔會影響日後同老細嘅關係;而李會長臨別秋波,酒後吐真言,明串某大人,都不可不謂「人之將x,其言也善」;某大人治下之犯眾憎,亦可見一斑也!

原文見《昆明夜訪談中大風雲》,《新報》A14版,2008年7月22日

沒有留言: